İddialara görə, ABŞ prezidenti Donald Trampla İsrailin Baş naziri Binyamin Netanyahu arasında telefon danışıqları dostcasına olmayıb və son Livanla bağlı telefon danışıqlarından birində Tramp Netanyahuya "Niyə binaları partladırsınız? Binaları partlatmağı dayandırın" deyib.
Hafta.az yazır ki, "The Wall Street Journal"ın qəzetinin məsələyə yaxın mənbələrə istinadən verdiyi məlumata görə, Trampla Netanyahu arasında tez-tez baş verən söhbətlər artıq dostcasına deyil və bildirilir ki, Tramp Netanyahunu ABŞ iqtisadiyyatını gərginləşdirən ABŞ-İsrail/İran müharibəsinə sövq etməkdə ittiham edir və eyni zamanda ona son qoymağa çalışır.
Məlumatda iddia olunur ki, Livanla bağlı son telefon danışığında Tramp Netanyahuya "Niyə binaları partladırsınız? Binaları partlatmağı dayandırın" deyib. Xəbərə görə, başqa bir görüşdə Tramp müharibənin yaratdığı qlobal iqtisadi böhranın onu 1930-cu illərin Böyük Depressiyası və Herbert Huver ilə əlaqələndirə biləcəyindən şikayətlənib.
Hesabatda istinad edilən bir mənbə iddia edir ki, razılaşmadan əvvəl nüvə silahları ilə bağlı müddəalar müzakirə olunan görüşdə Netanyahu Trampdan "Donald, bunu necə təsdiqləyəcəksiniz?" deyə soruşub və digər görüşlərdə keçmiş hadisələrə əsaslanaraq iranlılara etibar edilə bilməyəcəyini deyib.
Yüksək vəzifəli administrasiya rəsmisi də Netanyahunun görüşlərdə daha çox hərbi əməliyyatda israr etdiyini, Trampın bundan bezdiyini bildirib və deyib: "Bibi (Netanyahu) prezidentə nəyisə niyə partlatmalı olduğunu, İsrail kəşfiyyatının bunu necə və nə vaxt edəcəyini bildiyini deyir. Prezident dinləyir. Görüşlər adətən eyni şəkildə keçir".
İsrail Baş Nazirinin Ofisi iddialarla bağlı şərh verməkdən imtina edib.
Ağ Ev rəsmisi bildirib ki, "Trampın Netanyahu və İsrail ilə əla tərəfdaşlığı var", lakin "heç bir ölkə və ya lider prezident Trampa bir şey etmək üçün təzyiq göstərə bilməz".
Vəziyyəti yaxından izləyən mənbələr bildirib ki, Tramp bir çox müşavirinin və israillilərin gözlədiyindən daha çox İranla müharibəyə getmək istəyir və əlavə edib ki, Netanyahu İrana qarşı ətraflı hücum planları hazırlayıb və onları prezidentə təqdim edib.
Mənbələrin məlumatına görə, əvvəlcə Tramp hücumların dəqiqliyi, zərərsizləşdirilən İran liderlərinin sayı və növbəti bombardmanların harada baş verəcəyi ilə bağlı həyəcanlı idi. Lakin müharibə irəlilədikcə Tramp Netanyahunun bəzi iddialarına şübhə ilə yanaşdı və İran hökumətini devirmək üçün İraq kürd silahlı qruplarını İrana göndərmək planını rədd etdi.
Mənbələr bildirir ki, Trampı ən çox qəzəbləndirən şey atəşkəsə baxmayaraq İsrailin Livanı bombalamağa davam etməsi olub və Tramp bir vaxtlar İsrail və Livan rəsmilərini razılaşmaya şəxsən vasitəçilik etmək üçün Oval Ofisə çağırıb.
